Ní mór athoscailt na gcalafort agus na n-aerfort a bhainistiú go cúramach chun cosc a chur ar leathadh an dara ráig de COVID-19. I Taillinn, tá lámh chúnta á tabhairt ag oibrithe deonacha ó Chumann na Croise Deirge san Eastóin. Tá Gunnar ar dhuine de na hoibrithe deonacha sin. “Is é an ról atá agamsa ná déanamh deimhin de go bhfuil na paisinéirí ar fad a thagann isteach curtha ar an eolas mar is cuí agus go bhfuil a fhios acu conas na réamhchúraimí is gá a chur i bhfeidhm chun cosc a chur ar leathadh an víris. Seiceálaimid sláinte na bpaisinéirí agus a dteocht coirp agus tugaimid treoir bhunúsach dóibh”, a deir sé. Bíonn ról tábhachtach ag oibrithe deonacha Chumann na Croise Deirge, cosúil le Gunnar, sna hiarrachtaí chur i gcoinne na ráige seo. Cuireann siad an pobal ar an eolas, roinneann siad faisnéis maidir leis an víreas a chosc, cabhraíonn siad le mífhaisnéis a chosc, agus déanann siad ráflaí agus scaoll a shrianadh. Níl i Taillinn ach sampla amháin de na cathracha iomadúla ar fud na hEorpa atá ag gabháil de thionscnaimh den chineál céanna. Tá an Pharlaimint ag iarraidh teorainneacha AE a athoscailt go mear agus go hiomlán agus gan aon idirdhealú bunaithe ar náisiúntacht a bheith ann chun téarnamh eacnamaíoch AE a áirithiú tar éis phaindéim COVID-19. Faigh tuilleadh eolais anseo https://www.europarl.europa.eu/news/ga/headlines/security/20200506STO78514/rialuithe-ag-teorainneacha-inmheanacha-limistear-schengen-mar-gheall-ar-covid-19

De réir mar atá an coróinvíreas ag scaipeadh, tá go leor daoine ag obair ón mbaile. Tá scoileanna ar fud na hEorpa dúnta agus tá tréimsí fada á gcaitheamh le chéile sa teach ag formhór na dteaghlach. D’fhéadfadh sé lagmhisneach a chur ort a bheith ag iarraidh dualgais oibre a chur i gcrích agus tú ag breathnú i ndiaidh leanaí ag an am céanna. Chuige sin an feachtas ‘Léigh os Ard’. Tá Pille agus a foireann ag tacú le tuismitheoirí atá ag obair ón mbaile agus atá ag lorg gníomhaíochtaí oideachais agus tarraingteacha dá leanaí. Spreagann Léigh os Ard leanaí le scéalta a léamh, éisteacht le scéalta agus a gcuid féin a chumadh. Is trí ghlaonna duine le duine ar Facebook nó Skype a thugtar tacaíocht agus tá an t-ábhar oiriúnaithe do gach leanbh ar leith de réir an leibhéil léitheoireachta atá acu lena chinntiú nach gcaillfidh siad spéis ann. Trí léamh os ard, leantar de bheith ag feabhsú na litearthachta agus ag an am céanna méadaíonn muinín an linbh.

Smaoinigh ar na hEalaíona, Labhair faoin nGnó, Déan Cultúr! Is é sin mana ardáin RHI Stage, a chruthaigh Arte Institute ag RHI-Think.com, ardán ar ar féidir le healaíontóirí a scileanna a thaispeáint agus íocaíocht a fháil as sin. DELETION OF PARAGRAPH. Tá difear déanta do roinnt mhaith tionscal ag tionchar COVID-19 ar na Ballstáit. Ní haon eisceacht í earnáil an chultúir. Rinne an tAontas Eoraip na Cruthaitheachta a chur ar bun chun iasachtaí a chur ar fáil d’fhiontair bheaga agus mheánmhéide sna hearnálacha cultúrtha agus cruthaitheacha. Chuir sé cistí ar bun fosta chun tacaíocht a chur ar fáil i bhfoirm iasachtaí agus ráthaíochtaí. Is cúis dóchais é a fheiceáil go bhfuil pobail ar fud an Aontais in ann tacú le healaíontóirí ina gcuid oibre, agus dlúthpháirtíocht d’ealaíontóirí á léiriú tríd an ealaín í féin.