Voluntiera żgħażagħ Pollakki, li jiddedikaw ħinhom biex jgħinu lill-anzjani tagħhom: dan huwa dak li tagħmel "Recipe for Help". Imwaqqfa mill-fergħa ta' Lublin tas-Salib l-Aħmar tal-Polonja, l-inizjattiva tinkoraġġixxi voluntiera jċemplu lill-anzjani madwar ir-reġjun, u joffru konverżazzjonijiet amikevoli u anki għajnuna oħra skont il-bżonnijiet u l-eżiġenzi ta' kull persuna. "Jien inħoss li hemm bżonn kbir ta' din it-tip ta' għajnuna," tgħid Aleksandra, voluntiera żagħżugħa. "L-anzjani jistgħu jitkellmu magħna għal siegħat sħaħ dwar il-passat u l-valuri tagħhom. Naħseb li dan imur lil hinn mis-sitwazzjoni tal-COVID-19: l-anzjani jħobbu jqattgħu ħin ma' nies ta' età iżgħar minnhom u jaqsmu l-esperjenzi tagħhom." L-anzjani apprezzaw ħafna din l-inizjattiva peress li turi kif ftit ġesti jew "ingredjenti"sempliċi jistgħu jsaħħu l-komunitajiet. Kif issostni l-fergħa lokali tas-Salib l-Aħmar tal-Polonja, "tazza sikurezza, żewġ mgħaref għarfien, ftit rieda tajba, u erba' qatriet ħin, jagħmlu differenza enormi waqt il-pandemija tal-COVID-19."

Il-Coronavirus ma jieqafx mal-fruntieri, iżda lanqas ma jieqfu l-isforzi tagħna fil-ġlieda kontrih. Fir-reġjun madwar il-fruntieri tal-Polonja, il-Belarussja u l-Ukrajna, il-proġett b'finanzjament mill-UE "RESCUE" għen biex jiġu pprovduti ambulanzi u ventilaturi lill-isptarijiet biex it-tobba jkunu jistgħu jiġġieldu l-pandemija tal-coronavirus madwar il-pajjiżi u fil-periferija tal-UE. Piotr Gozdek imexxi t-taqsima tal-Mediċina Interna u tal-Kardjoloġija f'ċentru tas-saħħa f'Tomaszów Lubelski. "Peress li aħna ġirien qrib ħafna ta' xulxin, il-pazjenti tagħna, ikunu minn liema naħa tal-fruntiera jkunu, jistgħu jiddependu fuq kwalità ogħla ta' kura tas-saħħa. Il-kuntatti bejn l-isptarijiet jippermettulna li niskambjaw esperjenzi f'sitwazzjonijiet ta' kriżijiet tas-saħħa enormi, li m'hemmx dubju li l-pandemija tas-SARS-Cov2 hija waħda minnhom." Mhuwiex biss tagħmir li huwa pprovdut: il-proġett joffri korsijiet ta' taħriġ speċjalizzati għal 69 tabib, 48 persuna tas-salvataġġ, u 137 infermier, u qed isiru preparamenti għal inizjattivi ta' tagħlim għal 4,500 abitant.

Mhux dejjem ikun hemm bżonn armata ta' voluntiera biex isiru affarijiet kbar. Fi Wieliczka, belt viċin Krakow, għadd żgħir ta' Scouts adulti mill-Assoċjazzjoni Pollakka tal-Iscouts u l-Guides (ZHP) kienu qed jgħinu b'kull mod li setgħu sa minn nofs Marzu. Ħajjithom inbidlet drastikament u issa ddur madwar żewġ attivitajiet prinċipali: jipprovdu attivitajiet online interessanti għall-iscouts li għadhom żgħar u jgħinu lill-anzjani u lil dawk li jirċievu l-assistenza soċjali. Il-grupp diġà pprovda aktar minn 3,000 ikla, flimkien ma' tagħmir protettiv u konsenja ta' bżonnijiet ta' kuljum lil dawk fil-bżonn. "Li tgħin lil ħaddieħor u tagħmel volontarjat hija parti integrali mill-ħajja tal-Iscouts," qalet Anna. "In-nies ta' Wieliczka dejjem jistgħu joqogħdu fuqna, fi żmien il-COVID-19 jew le.

Iċ-ċapċip għal dawk li jipprovdu l-kura tas-saħħa huwa ġest simboliku apprezzat. Iżda hekk kif tiżdied il-pressjoni fuq l-isptarijiet, l-inizjattiva tibda tasal ukoll fil-limiti tagħha. L-eżawriment jiżdied, l-istress jikber u l-professjonisti tal-kura tas-saħħa jistgħu jibdew jibżgħu li se jimirdu huma jew il-maħbubin tagħhom. Iċ-ċentru kontra l-Istress u l-Eżawriment fl-Università ta' Łazarski fil-Polonja huwa konxju sew dwar dan ir-riskju. Biex inaqqsuh, huma bdew inizjattiva ta' għajnuna psikoloġika b'xejn għat-tobba, l-infermiera, il-paramediċi u esperti tad-djanjostika tal-laboratorju. Psikologi ta' esperjenza huma disponibbli nhar ta' Tnejn, l-Erbgħa, il-Ħamis u l-Ħdud biex jipprovdu għajnuna permezz ta' numru tat-telefon apposta. "Permezz ta' #GħajnunaNitkellmu (#PomagamyRozmawiamy), noffru għajnuna vera lil dawk li qed jiġġieldu direttament il-COVID-19. Nitkellmu direttament biex inaqqsu t-tensjoni u l-istress, biex ngħinu lill-persunal mediku jiffaċċja aħjar is-sitwazzjonijiet li jiltaqgħu magħhom ta' kuljum," spjega l-grupp.

#LOTdoDomu (Tir lura d-dar ma' LOT) kienet waħda mill-aktar operazzjonijiet tat-titjiriet diffiċli fuq livell organizzattiv u loġistiku fl-istorja tal-avjazzjoni ċivili Pollakka. Fi 22 ġurnata, il-linja tal-ajru nazzjonali Pollakka taret sa 71 belt fi 53 pajjiż madwar id-dinja. L-operazzjoni ġiet ippreparata f'ħeffa liema bħala biex jgħinu lill-kompatrijotti li nqabdu f'pajjiż ieħor, 'il bogħod mill-familji tagħhom, minħabba l-pandemija tal-COVID-19. "F'tant modi, dawk it-titjiriet kienu differenti mit-titjiriet tagħna tas-soltu. Kull titjira kienet tinħass qisha missjoni ta' salvataġġ" tistqarr Olga, membru tal-ekwipaġġ tal-kabina f'uħud minn dawk it-titjiriet. Din il-linja tal-ajru wettqet 388 titjira minn sitt kontinenti, fejn ġew ittrasportati passiġġieri mill-Perù, il-Messiku, l-Arġentina, il-Ġappun, l-Istati Uniti tal-Amerka, l-Awstralja u ħafna pajjiżi oħra. B'kollox, LOT ġabet lura d-dar aktar minn 54,000 ċittadin Pollakk.

Ħafna imprendituri nqabdu bla mistenni mill-COVID-19 u l-konsegwenzi tagħha fuq in-negozji tagħhom. X'għandhom jagħmlu f'każ ta' tfixkil tal-katina ta' provvista? Kif japplikaw il-klawżoli ta' force majeure għall-kumpaniji tagħhom? Biex tgħinhom iwieġbu domandi bħal dawn, Małgosia , avukata Pollakka, iddeċidiet li toħloq kanal YouTube "Inqarrbu l-liġi lejn l-imprendituri". "Jien noffri gwida lill-imprendituri dwar l-aħħar regolamenti u l-għajnuna finanzjarja pubblika li jistgħu jirċievu", hija spjegat. "Peress li r-regolamenti dwar il-COVID-19 fil-Polonja qed jiġu aġġornati l-ħin kollu, aħna wessajna l-kunċett saħansitra aktar bl-għajnuna ta' Katarzyna". Huma issa qed jiffokaw fuq il-qsim tal-għarfien legali permezz ta' webinars u konsultazzjonijiet fuq it-telefon b'xejn man-negozji żgħar. Is-suġġetti li jkopru jinkludu l-protezzjoni tad-data u l-privatezza tal-impjegati li jaħdmu mid-dar. L-informazzjoni fuq l-inizjattiva hija disponibbli fuq is-sit web tal-kumpanija u l-paġna ta' Facebook.