Alberto dejjem ħadem fl-aħjar interess tal-komunità tiegħu. Bħala bidwi organiku, xogħolu essenzjalment kien li jipprovdi ikel ta' kwalità liċ-ċittadini ta' Laguna de Negrillos (León) u lil hinn. Il-COVID-19 ma biddlitx wisq mir-rutina tiegħu ta' kuljum. Ħlief forsi għal ħaġa waħda: Huwa beda jaħdem ukoll il-Ħdud, u l-isforzi bla heda tiegħu kienu nnutati mill-Organizzazzjoni tal-Ikel u l-Agrikoltura tan-Nazzjonijiet Uniti (FAO). "Aħna bqajna essenzjalment naħdmu bl-istess mod, iżda bdiewa oħra u jien ħriġna bl-idea li ngħinu lill-awtoritajiet jiddiżinfettaw it-toroq u sorsi pubbliċi oħra possibbli ta' kontaġju," jispjega Alberto. "Aħna ressaqna din l-idea, u l-gvern tagħna l-linji gwida neċessarji." Alberto malajr ġabar tim ta' voluntiera. Messaġġ wieħed kien biżżejjed biex jikkonvinċihom: "Jekk nistgħu nikkollaboraw u nsalvaw jew nipproteġu l-anzjani tagħna minn infezzjoni possibbli, mela m'għandniex noqgħodu lura." Il-voluntiera użaw it-tratturi tagħhom kull fejn setgħu, u għamlu l-kumplament manwalment. Dan juri l-impenn qawwi tagħhom biex jgħinu lill-komunità tagħhom.

Għas-sidien tar-ristoranti madwar l-Ewropa, il-COVID-19 kien qisu rollercoaster ta' emozzjonijiet. Viri, li kellha tagħlaq ir-ristorant tagħha "El Llar de Viri" meta bdiet il-lockdown fi Spanja, taf dan sew wisq. "Id-deċiżjoni li jingħalqu r-ristoranti kollha qabditna sorpriżi. Ma stajniex nemmnuha! Għaddejna minn ħafna fażijiet differenti. L-ewwel kien hemm l-inċertezza, imbagħad l-istagħġib. Imbagħad kien hemm il-fażi meta ma tkunx tista' toqgħod bi kwietek aktar u tkun trid bilfors tagħmel xi ħaġa," hija spjegat. Viri sfruttat din l-attitudni kompletament. Hija bdiet tħejji pakketti tal-ikel għall-klijenti u bdiet ġnien tal-ħxejjex. "Issa ninsabu 0 minuti 'l bogħod mill-ingredjenti tagħna," hija qalet b'entużjażmu. Wara li b'suċċess fetħet mill-ġdid, Viri qatt ma kienet daqshekk kuntenta li tara l-uċuh familjari tal-aktar klijenti regolari tagħha. Għadha beżgħana mill-ġejjieni, imma se tieħu gost b'kull mument ċkejken li tqatta' magħhom aktar minn qatt qabel.

Fit-13 ta' Marzu, ir-reġjun Spanjol ta' Murcia għalaq il-fruntieri tiegħu biex jipprova jillimita t-tixrid tal-coronavirus. B'dak il-pass neċessarju ħafna seħħ ukoll waqfien f'daqqa waħda u komplut tal-industrija tat-turiżmu li fuqha tiddependi ż-żona kollha. Bħala sid ta' ċentru tal-bugħaddasa, Isabel Laguardia ntlaqtet b'mod partikolarment ħażin. Hija kellha tagħlaq iċ-ċentru u tissospendi l-pjanijiet kollha tagħha biex timpjega ħaddiema għall-vaganzi tal-Għid u l-istaġun tas-sajf li fihom normalment ikollhom ħafna xogħol. L-UE aġixxiet malajr biex tgħin tipproteġi negozji żgħar bħal ta' Isabel. Leġiżlazzjoni ġdida għamlet ir-regoli dwar l-għajnuna mill-istat aktar flessibbli. Il-gvern Spanjol issa jista' joffri appoġġ finanzjarju lin-negozji b'mod aktar mgħaġġel sabiex ikunu jistgħu jevitaw jagħtu sensji waqt it-tifqigħa tal-coronavirus. Tali regoli jippermettu lill-Istati Membri jieħdu azzjoni effettiva u b'ħeffa biex jappoġġaw liċ-ċittadini u lill-kumpaniji, b'mod partikolari negozji żgħar, li jiffaċċaw diffikultajiet ekonomiċi minħabba l-COVID-19. L-Istati Membri kollha se jkunu jistgħu jwaqqfu skemi biex jagħtu sa €800,000 lil kumpanija biex tindirizza l-bżonnijiet urġenti tagħha.

Salad Planet huwa snack bar li jipprovdi lill-klijenti tiegħu prodotti friski, lokali u tajbin għas-saħħa. Il-kunċett tiegħu tas-"salad bar" mill-ewwel għamel suċċess. Malajr sar post popolari man-nies ta' Valencia. Għal Antoine, is-sid ta' Salad Planet, il-lockdown kien l-agħar ħaġa li setgħet tiġri. "Malli faqqgħet il-pandemija, kelli ngħalaq ir-ristorant tiegħi mill-15 ta' Marzu sal-10 ta' Mejju. L-impjegat tiegħi u jien ma kellniex triq oħra ħlief li napplikaw għall-benefiċċji tal-qgħad temporanju," jirrakkuntalna. Li jerġa' jiftaħ ir-ristorant ma kien faċli xejn. L-ewwel kellu jservi biss takeaways, imbagħad, bil-mod il-mod, ir-ristorant seta' jerġa' jiftaħ. L-ewwel fetaħ it-terrazzin biex jilqa' nofs in-nies li jiflaħ il-post u mbagħad fetaħ ir-ristorant innifsu fejn qed jilqa' biss tletin fil-mija ta' kemm jiflaħ. "Salad Planet jinstab fil-qalba tal-kwartieri tan-negozju ta' Valencia, b'hekk tlift il-parti l-kbira tal-klijentela regolari tiegħi li se jkunu qed jaħdmu mid-dar sa Settembru. S'issa għadni qed naħdem waħdi, peress li l-impjegat tiegħi għadu taħt qgħad temporanju," jgħidilna Antoine.

Mijiet ta' skrapan – magħrufa bħala "aparadoras" fi Spanja – ingħaqdu fi sforz koordinat. Minn djarhom u bil-magni tagħhom, huma jħitu maskri u ġagagi għan-nies li jkollhom bżonnhom mingħajr ma jitolbu xejn lura. Dak li beda bħala esperiment wara t-tifqigħa tal-coronavirus issa jissarraf fil-produzzjoni ta' mijiet ta' maskri kuljum. Dawn l-iskrapan nisa joffru jdejhom, għarfienhom u ħinhom, u jisfidaw lilhom infushom biex jegħlbu diffikultajiet tekniċi. "Biex tuża l-magna li nużaw biex inħitu ż-żraben, trid aktar sforz u preċiżjoni għax id-drapp tal-maskri kien irqieq wisq u beda' jiċċarrat faċilment," qalet Pilar. Minkejja dan, il-grupp ma qatax qalbu meta sema' li l-istokk tal-maskri f'Alicante kien qed jonqos sew. Huma għadhom qed jirċievu donazzjonijiet ta' materjali sterilizzati u għadhom impenjati biex jegħlbu kwalunkwe ostakolu li jsibu quddiemhom.

Ainhoa, li għandha 26 sena, kienet se tibda l-ispeċjalizzazzjoni tagħha fl-ostetrija u l-ġinekoloġija meta l-proċess ġie sospiż minħabba l-pandemija. Peress li riedet tingħaqad fil-ġlieda kontra l-COVID-19, hija ddeċidiet li taħdem bħala tabiba f'dar tal-kura. Fi Spanja, ħafna mwiet marbuta mal-coronavirus ġraw fi djar tal-kura fejn jgħixu flimkien uħud minn dawk l-aktar vulnerabbli. Għad fadal ħafna xi jsir f'din il-ġlieda iżda Ainhoa tistabar billi taf li ma ġie rapportat l-ebda każ fid-dar tal-kura fejn taħdem hi. Għalkemm dan huwa impjieg temporanju u hija daqt tibda r-residenza tagħha fi sptar, Ainhoa tqis li din hija esperjenza ta' sodisfazzjon kemm fuq livell professjonali kif ukoll dak personali peress li l-valuri u t-tagħlimiet li rċeviet mill-anzjani immaturawha bħala persuna. "Dalwaqt noħorġu minn dan kollu. Se jirnexxielna!" qalet Ainhoa.

Meta faqqgħet il-pandemija fi Spanja, Elena ħasset li kellha tgħin lit-tobba u lill-infermiera li kienu qed jikkumbattu biex isalvaw ħajjet in-nies. Malajr tgħallmet waħedha tħit fuq il-magna tal-ħjata antika t'ommha u bdiet tipproduċi maskri mid-drapp li kellha d-dar. Meta lestiet l-ewwel 25 maskra tagħha, hija tagħthom lil dar tal-anzjani viċin fejn toqgħod. Imbagħad skopriet li ġar tagħha kien ħoloq grupp fejn kull membru wiegħed li jħit 200 maskra f'5 t'ijiem. Il-pulizija pprovdewlhom id-drapp, ġabru l-maskri meta kienu lesti, u qassmuhom mill-għassa tal-pulizija tagħhom. Hija daħlet għal din l-isfida u mbagħad ingħaqdet ma' grupp ieħor li jagħmel il-ġagagi għall-persunal mediku li jaħdem fid-djar tal-anzjani f'Madrid. Reċentement, Elena ingħaqdet ukoll mal-grupp "Sponge Cakes”, li jqassam gallettini magħmulin id-dar, lix-shelters, lis-Salib l-Aħmar, u lil organizzazzjonijiet oħra li jipprovdu ikel lil familji żvantaġġati - u dan kollu waqt li taħdem mid-dar u tieħu ħsieb lit-tliet uliedha.

Eusebio Alonso Redondo jikkoordina l-Bank tal-Ikel ta' Tarragona, li kuljum jipprovdi l-ikel lil aktar minn 25,000 persuna fil-provinċja. Eusebio huwa nutar irtirat li issa jiddedika ħinu għal dan l-isforz ta' solidarjetà, li jirċievi bosta tunnellati ta' prodotti tal-ikel kuljum minn kumpaniji agroalimentari, supermarkets, ħwienet kbar, u kooperattivi rurali. Anki familji bi ftit flus jagħtu donazzjoni ta' 10 jew 15-il ewro lill-bank tal-ikel biex jgħinu lil dawk li huma inqas ixxurtjati minnhom. "Hemm solidarjetà akbar minn din?" jistaqsi Eusebio. L-appoġġ tan-nies madwar l-Ewropa għal dawk fil-bżonn iġġiegħel lil Eusebio japprezza l-ġenerożità enormi umana, intellettwali u politika tal-fundaturi tal-Komunità Ekonomika Ewropea, li wittiet it-triq għat-Trattat ta' Ruma fl-1957. Hekk kif jgħid Eusebio, "L-imħabba u s-solidarjetà jmorru flimkien. U dak huwa l-wirt tagħna għall-ġejjieni."

Bħala ġurnalist speċjalizzat fis-saħħa, David qiegħed fuq quddiem nett fl-għoti ta' informazzjoni dwar il-COVID-19, u prinċipalment ikopri l-konferenzi stampa tal-awtoritajiet tas-saħħa Spanjoli. Bħala membru tal-Europa Press, il-mod tiegħu kif jiġġieled il-virus huwa billi joffri data u fatti verifikati biex jiġu miġġielda d-diżinformazzjoni u l-istejjer foloz. Bħall-Ispanjoli kollha, huwa kien qed jaħdem mid-dar u josserva mill-qrib il-konfinament, li jagħmel ir-rappurtaġġ dwar is-sitwazzjoni sfida akbar. Iżda billi jaħdem b'dan il-mod, David jiżgura li huwa jipproteġi ruħu, jipproteġi lil ħaddieħor, u jżomm l-udjenzi tal-Europa Press aġġornati, u fl-aħħar mill-aħħar isalva l-ħajjiet. Hekk kif tinxtered il-pandemija, din tat lok ukoll lil pandemija oħra ta' miżinformazzjoni, minn pariri tas-saħħa li huma ta' ħsara sa teoriji ta' kospirazzjoni eżaġerati. L-istampa tipprovdi s-soluzzjoni: aħbarijiet u analiżi vverifikati, xjentifiċi u bbażati fuq il-fatti. Esperti u politiċi mill-UE regolarment jorganizzaw vidjokonferenzi fejn jaqsmu metodi effettivi biex jindirizzaw l-impatti tad-diżinformazzjoni.

L-iżvilupp ta' tilqima tkun żvolta radikali fil-ġlieda kontra l-COVID-19. Tomás Pose, Natalia Barreiro, Rebeca Menaya, u José Manuel Martínez Costas huma t-tim wara dan il-proġett f'laboratorju fil-binja CIQUS, fl-Università ta' Santiago de Compostela. Xogħolhom jikkonsisti fl-ipprogrammar ta' ċelluli, ta' kwalunkwe oriġini, biex jipproduċu mikrosferi li jassorbu l-proteini tal-virus. Bħal f'kull proġett ieħor bl-għan li tiġi żviluppata tilqima, l-għan huwa li ġisimna jiġġenera rispons immunitarju li jwaqqaf il-virus. Skont Tomás, l-iżvilupp ta' tilqima jista' tieħu aktar minn sena, peress li l-proċess jinvolvi sa tliet provi kliniċi qabel mat-tilqima tista' tiġi meqjusa bħala sikura għall-bniedem. Madankollu, is-sistema innovattiva maħluqa esklużivament f'dan il-laboratorju tipprometti ħafna. Reċentement l-Istitut tas-saħħa Carlos III, li huwa parti mill-Ministeru tax-Xjenza, Innovazzjoni u Edukazzjoni Għolja, appoġġa lit-tim permezz ta' EUR 150 000 sabiex tkun tista' tibda fażi ġdida kruċjali tal-proġett.

F'ħafna pajjiżi, l-anzjani huma dawk li f'dawn iż-żminijiet qed jiffaċċjaw l-aktar theddid u sfidi. Għalkemm nies ta' kull età qegħdin f'riskju li jimirdu bil-COVID-19, l-anzjani għandhom riskju għoli li jiżviluppaw mard serju jekk jimirdu bih, minħabba tibdiliet fiżjoloġiċi kkawżati mill-età u kundizzjonijiet ta' saħħa sottostanti potenzjali. Yolanda u bintha Aitana għamluha l-missjoni tagħhom li jgħinu lill-anzjani fil-ħajja tagħhom ta' kuljum waqt dan iż-żmien diffiċli. Aitana tiżgura li n-nanniet tagħha jkollhom biżżejjed x'jieklu. Tgħinhom jagħmlu lista għax-xirja. Ommha tuża l-lista meta tmur tixtrilhom u tħallilhom l-affarijiet barra l-bieb. Huma jżommu kuntatt regolari permezz tal-vidjokonferenzi biex in-nanniet tagħha jħossuhom inqas iżolati soċjalment u aktar appoġġati. Yolanda tassisti wkoll lil dawk l-anzjani li saru aktar dipendenti fuq l-oħrajn fil-bini fejn jgħixu. Billi toħorġilhom l-iskart u tiġbrilhom dawk il-mediċini li jista' jkollhom bżonn mill-ispiżerija, hija tagħmel aktar faċli ħajjet dawn in-nies li huma aktar vulnerabbli għall-COVID-19.

Mindaugas Gudelis ilu jaħdem bħala tabib ma' FC Barcelona minn qabel it-tifqigħa tal-COVID-19. Fl-ewwel jiem tal-epidemija, huwa offra li jgħin fuq quddiem nett tal-ġlieda kontra l-virus, fl-Isptar ta' Lleida fi Spanja u, barra minn hekk, beda jaqsam videos interessanti, ibbażati fuq il-fatti, li nfirxu malajr u b'mod wiesa' fuq il-midja soċjali fil-Litwanja.

Ignacio kien xortih tajba li rċieva kunsinna ta' maskri minn ħbiebu li jgħixu Singapore. Hu u sejjer ix-xogħol, induna li membri tal-Guardia Civil - li kienu qed jiżguraw li l-pubbliku kien qed josserva r-regoli tas-sikurezza waqt il-lockdown - kienu qed jaħdmu mingħajr ebda tagħmir protettiv. Ignacio offra li jaqsam l-istokk ta' maskri li kellu mal-pulizija mingħajr ħlas. Huma apprezzaw ħafna dan il-ġest.

Minbarra l-problemi ekonomiċi li jistgħu jaffettwaw lil dawk li ma jistgħux jaħdmu mid-dar, din il-kwarantina jista' jkollha effetti serji fuq is-saħħa mentali tan-nies minħabba n-nuqqas ta' interazzjoni soċjali u attivitajiet barra mid-dar. Biex tgħin lill-oħrajn jindirizzaw din is-sitwazzjoni, grupp ta' għaxar professjonisti ppreparaw gwida dwar l-effetti psikoloġiċi tal-kwarantina u kif nistgħu nindirizzawhom. Kulħadd jista' jibbenefika mill-gwida "psiCOVIDa-10", kif inhi magħrufa. Huma ħadu ħsieb b'mod speċjali li jinkludu appoġġ għall-anzjani, familji bit-tfal u/jew tfal b'diżabbiltajiet, nies li jieħdu ħsieb persuni morda, teleworkers, persunal tas-saħħa u professjonisti oħra affettwati.

Peress li ħafna nies qed joqogħdu d-dar, l-industrija tal-ospitalità ġiet milquta b'mod partikolarment diffiċli matul il-kriżi tal-coronavirus. Sabiex tappoġġaha, il-kumpanija ta' Sara s'issa tat miljun Euro lill-persunal li ġie affettwat mill-COVID-19, u offriet ukoll programmi ta' taħriġ online għall-professjonisti kollha li jaħdmu fis-settur tal-lukandi u tal-catering. Għadna ma nafux meta din il-kriżi se tintemm. Iżda biex inkunu żguri li noħorġu minnha aktar b'saħħitna, l-Unjoni Ewropea diġà qiegħda taħdem fuq baġit ġdid sod għall-Ewropa.

Matilde hija professur tal-Università Complutense u anestetista fl-Isptar tal-Università Gregorio Marañón (HGUGM) f'Madrid. Matul l-epidemija hija kkontribwiet għall-organizzazzjoni ta' sodod ġodda biex jikkuraw pazjenti morda b'mod kritiku fl-HGUGM. Dan ippermetta lill-isptar jgħaddi minn sitwazzjoni fejn seta' jikkura 40 pazjent kritiku f'daqqa fil-bidu tat-tifqigħa għal 115-il każ kritiku fl-agħar mumenti tal-kriżi. Dan ippermetta t-trattament tal-aktar pazjenti morda serjament u l-isforz salva ħafna ħajjiet. Matilde kienet sorpriża ħafna bid-dedikazzjoni u l-enerġija murija mill-kollegi tagħha kollha matul dawn iż-żminijiet diffiċli. Biex ikun żgurat li tali persunal mediku dedikat ikollu t-tagħmir li jeħtieġ biex jagħmel xogħlu b'mod effettiv, il-Kummissjoni Ewropea issa qed tipproteġi d-disponibbiltà tal-fornimenti ta' tagħmir protettiv personali billi tirrestrinġi l-esportazzjonijiet ta' tali tagħmir barra mill-UE.

Amparo taħdem fl-Instituto de Salud Carlos III. Il-ħidma tagħha hija ffukata fuq il-ksib tal-aktar informazzjoni possibbli mis-sistemi ta' sorveljanza tal-COVID-19, u minn sorsi ta' data sekondarja oħra, biex tiggwida lill-awtoritajiet tas-saħħa lokali u nazzjonali fil-kontroll tal-pandemija. It-tim tagħha jipparteċipa wkoll fil-proġett I-MOVE-COVID-19, iffinanzjat mill-Orizzont 2020 tal-UE. B'kollox ingħataw EUR 47.5 miljun f'finanzjament fil-programm Orizzont 2020 għal 17-il proġett ta' riċerka magħżula biex jilħqu għarfien akbar tal-COVID-19 u jtejbu l-ġestjoni klinika. Bħalissa għaddejja wkoll talba oħra għall-proposti ta' EUR 45 miljun għat-terapewtika u d-dijanjostika biex jindirizzaw tifqigħat tal-coronavirus kurrenti u futuri, taħt l-Inizjattiva tal-Mediċini Innovattivi.

Bħala membru tal-Europa Press, il-fotoġurnalisti bħal Eduardo jservu biex juruna d-dinja meta aħna ma nistgħux narawha u għalhekk iġorru responsabbiltà kbira. Xhieda fis-silenzju ta' avvenimenti storiċi, huma impenjati biex juru l-verità billi jwarrbu s-suġġestjonar, il-kompromess jew l-intervent. Għaliex il-fotografija hija importanti għalihom u, permezz ta' xogħolhom, għalina wkoll? Ir-ritratti huma l-lingwa universali ta' żmienna. Il-fotoġurnalisti jorganizzaw il-kaos li għandna fid-dinja permezz tal-istampi li jiċċaraw il-konfużjoni li hawn madwarna. Huma jiġbdulna l-attenzjoni għal affarijiet li ma nkunux tajna kashom, għal ġrajjiet u persuni li jkunu jinsabu 'l bogħod ħafna mir-rokna tagħna fl-Ewropa. It-tifqigħa tal-coronavirus wasslet għal firxa ta' diżinformazzjoni li ttellef l-isforzi biex titrażżan il-pandemija. L-Unjoni Ewropea hija impenjata biex tqajjem kuxjenza dwar il-perikli tad-diżinformazzjoni, mhux biss għas-saħħa taċ-ċittadini, iżda wkoll għad-demokrazija. Bħalma nirrispettaw it-tbegħid soċjali u bħalma naħslu jdejna, għandna d-dmir li nwaqqfu t-tixrid tal-pariri foloz u tal-istejjer manipolattivi.

Minkejja li rridu noqogħdu d-dar biex innaqqsu t-tixrid tal-virus, dan ma jfissirx li ma nistgħux ngħinu lill-persuni li jinsabu fiż-żoni l-aktar milquta minn din it-tifqigħa. Sara ddeċidiet li tgħin fil-produzzjoni tal-maskri għall-ħaddiema fil-kura tas-saħħa billi tagħmilhom minn darha f'Madrid. Il-professjoni ta' Sara hija ta' għalliema u hija rat dan iż-żmien 'il bogħod mill-klassi bħala opportunità biex turi solidarjetà u kompassjoni mal-komunitajiet ta' madwarha. Madwar l-UE kollha, aħna rajna kif l-azzjoni ta' persuna waħda tista' tgħin lil ħafna u ħafna oħrajn. Il-promozzjoni tal-valur tal-ħidma flimkien hija importanti ħafna fil-ġlieda tagħna kontra l-virus. Għid grazzi lil xi ħadd li taf li qed jippromwovi s-solidarjetà Ewropea bil-mod tiegħu.

Att ta' qalb tajba jista' jibda reazzjoni katina li tikber fuq li tikber. Dan ġara lil Ana María u lil żewġha, it-tnejn vjolinisti, li jum fost l-oħrajn iddeċidew li jagħtu kunċert ta' bla ħsieb lill-ġirien tagħhom mill-gallarija. L-għada, minn gallarija oħra, ingħaqad magħhom ġar idoqq il-viola u l-għada ġar ieħor idoqq is-sassofonu. Il-komunità tagħhom issa kuljum saret tistenna l-kunċert ta' nofsinhar tagħhom, imħeġġa mill-mużika tagħhom u mill-għarfien li mhumiex waħedhom f'dawn iż-żminijiet mhux tas-soltu. Madwar l-Ewropa kollha naraw ċittadini jikkontribwixxu bit-talenti uniċi tagħhom bħala #EwropejKontraCovid19. Jista' jkun li anki int għandek xi ħaġa li tħobb li tista' ssebbaħ il-ġurnata ta' dawk ta' madwarek. Fl-Ewropa, aħna lkoll għandna rwol. Se negħlbu dil-kriżi flimkien.

Cecilia u żewġha jmexxu farm tal-familja tagħhom li tipproduċi l-ħalib: huma l-uniċi nies li qed jaħdmu fuq il-farm bħalissa, u bis-saħħa tal-isforzi tagħhom baqgħet għaddejja l-produzzjoni. Huma baqgħu jaħdmu b'għożża matul din il-kriżi biex jiżguraw li l-prodotti bażiċi bħall-ħalib, jibqgħu disponibbli għall-ħafna familji li jiddependu fuqhom. Bħal ħafna farms lokali tal-familja, huma jsibu l-appoġġ tal-Politika Agrikola Komuni tal-UE. Aktar minn qatt qabel, huma kburin b'ħidmithom: huma jafu li n-nies qed jiddependu fuqhom biex ikomplu jipprovdulhom prodotti essenzjali li ħafna drabi ma konna qatt naħsbu li se jonqsu. U huma se jkomplu jaħdmu bla heda f'dawn iż-żminijiet diffiċli, minkejja d-diffikultajiet kollha li se jiffaċċjaw.