skip to content
 
 

Bijografija

bg es cs da de et el en fr ga hr it lv lt hu mt nl pl pt ro sk sl fi sv

Martin Schulz twieled fl-20 ta' Diċembru 1955 u kiber f'Hehlrath, il-Ġermanja, qrib il-fruntieri bejn il-Ġermanja, in-Netherlands u l-Belġju. Wara l-iskola sekondarja, iddeċieda li jipprova jaqla' l-għajxien tiegħu mill-imħabba kbira tiegħu għall-kotba, u għamel apprendistat bħala bejjiegħ tal-kotba. Fl-1982 fetaħ ħanut tal-kotba tiegħu stess f'Würselen, li mexxa b'suċċess għal 12-il sena.

Issieħeb fil-Partit Soċjal-Demokratiku (SPD) tal-Ġermanja fl-età ta' 19-il sena, u beda l-karriera politika tiegħu. Ta' 31 sena, ġie elett bħala l-aktar sindku żagħżugħ fin-Nordrhein-Westfalen, kariga li dam jokkupa 11-il sena.

Martin Schulz ilu Membru tal-Parlament Ewropew mill-1994, u serva f'numru ta' kumitati, l-ewwel fis-Sottokumitat għad-Drittijiet tal-Bniedem u mbagħad fil-Kumitat għal-Libertajiet Ċivili u l-Affarijiet Interni. Beda jmexxi lill-MPE tal-SPD fl-2000, u sussegwentement ġie elett bħala Viċi President tal-MPE Soċjalisti.

Fl-2004 ġie elett kap tal-grupp tat-tieni l-akbar grupp fil-Parlament Ewropew. Bħala mexxej tas-Soċjalisti u d-Demokratiċi fil-Parlament Ewropew, Martin Schulz ħadem favur il-ġustizzja soċjali, il-promozzjoni tal-impjiegi u tat-tkabbir, ir-riforma tas-swieq finanzjarji, il-ġlieda kontra t-tibdil fil-klima, il-promozzjoni tal-ugwaljanza u l-ħolqien ta' Ewropa aktar b'saħħitha u aktar demokratika.

Martin Schulz ġie elett bħala President tal-Parlament Ewropew fis-17 ta' Jannar 2012 għal mandat ta' sentejn u nofs, bi 387 vot. Fl-1 ta' Lulju 2014 reġa' ġie elett bħala President b'409 voti, biex b'hekk sar l-ewwel President fl-istorja tal-Parlament Ewropew li ġie elett għat-tieni mandat.
Fl-14 ta' Mejju 2015, rebaħ il-Premju Internazzjonali Karlu Manju ta' Aachen, li jonora "gwida eċċellenti ta' Ewropa magħquda li kiseb merti importanti u dejjiema għall-isforzi tiegħu favur it-tisħiħ tal-Parlament, is-sistema parlamentari u l-leġittimizzazzjoni demokratika fl-UE".

Huwa miżżewweġ u għandu żewġt itfal, u l-passatempi tiegħu jinkludu l-qari, l-istorja u l-futbol. Fost il-kotba favoriti tiegħu nsibu "Il Gattopardo" ta' Tomasi di Lampedusa u l-kotba kollha ta' Eric Hobsbawm.

CV

  • Apprendist bħala bejjiegħ tal-kotba (1975-1977).
  • Ħadem f'diversi ħwienet tal-kotba u kumpaniji ta' pubblikazzjoni (1977-1982).
  • Proprjetarju ta' ħanut tal-kotba (1982-1994).
  • Membru tal-Bureau u tal-Eżekuttiv Federali tal-SPD (mill-1999).
  • Kunsillier Muniċipali, Würselen (mill-1984).
  • Sindku ta' Würselen (1987-1998).
  • Membru tal-Parlament Ewropew (mill-1994).
  • Koordinatur tal-Grupp Soċjalista, Sottokumitat għad-Drittijiet tal-Bniedem (1994-1996).
  • Koordinatur tal-Grupp Soċjalista, Kumitat għal-Libertajiet Ċivili u l-Affarijiet Interni (1996-2000).
  • President, Grupp tal-SPD, Parlament Ewropew (2000-2004).
  • L-Ewwel Viċi President, Grupp Soċjalista (2002-2004).
  • President tal-Grupp Soċjalista (2004-2009).
  • President tal-Grupp S&D (mill-2009).
  • Rappreżentant tal-SPD għar-Relazzjonijiet mal-UE (mill-2009).
  • President tal-Parlament Ewropew (minn Jannar 2012).
  • Elett mill-ġdid bħala President tal-Parlament Ewropew (minn Jannar 2014).
  • Ingħata l-Premju Internazzjonali Karlu Manju ta' Aachen (Mejju 2015).