Deskrizzjoni:

Il-Parlament Ewropew jadotta l-Att dwar is-Servizzi Diġitali u l-Att dwar is-Swieq Diġitali, li l-għan tagħhom huwa r-regolamentazzjoni tal-pjattaformi "big tech" u joħolqu spazju diġitali aktar sikur.

L-Att dwar is-Swieq Diġitali jistabbilixxi regoli ċari għall-pjattaformi l-kbar, li għandhom l-għan li jwaqqfuhom milli jimponu kundizzjonijiet inġusti fuq in-negozji u l-konsumaturi.

L-Att dwar is-Servizzi Diġitali jimmira li jħares lill-utenti minn kontenut illegali u ta' ħsara u jistabbilixxi swieq online aktar sikuri u pjattaformi trasparenti.

Deskrizzjoni:

Il-Presidenti tal-Parlament Ewropew, tal-Kunsill u tal-Kummissjoni rċevew ir-rapport finali tal-Konferenza dwar il-Futur tal-Ewropa u wegħdu li jieħdu azzjoni fir-rigward tiegħu.

Waqt ċerimonja fi Strasburgu, il-Presidenti tal-istituzzjonijiet tal-UE rċevew id-dokument li fih 49 proposta b'aktar minn 300 miżura adottata mill-plenarja tal-Konferenza, abbażi tar-rakkomandazzjonijiet u tal-ideat taċ-ċittadini.

Fil-ġimgħat ta' wara, il-plenarja tal-Parlament tagħmel appell għal reviżjoni tat-trattati tal-UE sabiex l-UE tkun tista' tieħu azzjoni aktar malajr u b'mod aktar deċiżiv f'firxa ta' oqsma. Il-Membri tal-PE jħeġġu lill-Kunsill Ewropew jibda l-proċess tal-bdil tat-trattati.

Deskrizzjoni:

It-truppi Russi jinvadu l-Ukrajna, wara ġimgħat ta' tisħiħ tal-forzi militari u tentattivi diplomatiċi li ma swew xejn min-naħa tal-mexxejja internazzjonali biex jevitaw li l-gwerra terġa' tfaqqa' fl-Ewropa.

Il-Parlament Ewropew jikkundanna l-attakk bħala wieħed mhux provokat u inġustifikat. Il-Membri tal-PE jappellaw għall-appoġġ favur l-Ukrajna, inkluż il-forniment ta' armi difensivi, u huma favur sanzjonijiet ħorox kontra r-Russja.

L-invażjoni tipprovoka kriżi umanitarja fl-Ukrajna u mewġa enormi ta' rifuġjati lejn l-UE.

Deskrizzjoni:

Il-Membri tal-PE jadottaw il-Liġi Ewropea dwar il-Klima li torbot lill-UE tilħaq in-newtralità sal-2050 f'termini ta' emissjonijiet ta' gassijiet serra.

Biex jonqsu l-emissjonijiet sal-2030, il-liġi tiffissa objettiv ambizzjuż ġdid: tnaqqis ta' mill-inqas 55% meta mqabbel mal-livelli tal-1990, minflok 40%. F'fażi aktar tard, il-Kummissjoni għandha tipproponi objettiv intermedju għall-2040.

Deskrizzjoni:

Il-Konferenza dwar il-Futur tal-Ewropa hija varata uffiċjalment b'ċerimonja fil-Parlament Ewropew fi Strasburgu.

Fil-ġimgħat ta' wara, iċ-ċittadini Ewropej għandhom l-opportunità li jipproponu ideat għal azzjoni tal-UE permezz ta' pjattaforma online jew billi jieħdu sehem f'avvenimenti.

Il-panels taċ-ċittadini Ewropej jiltaqgħu fi Strasburgu, online u fil-bliet tal-UE kollha biex iħejju r-rakkomandazzjonijiet. Ir-rappreżentanti tal-panels imbagħad jippreżentaw u jiddiskutu l-ideat mal-membri tal-istituzzjonijiet tal-UE, tal-parlamenti nazzjonali, tal-awtoritajiet reġjonali u tal-organizzazzjonijiet tas-soċjetà ċivili. L-istituzzjonijiet tal-UE jintrabtu li jieħdu azzjonijiet dwar il-konklużjonijiet tal-Konferenza.

Deskrizzjoni:

Il-Parlament Ewropew jagħti l-approvazzjoni tiegħu lill-ftehim li jistabbilixxi r-regoli għar-relazzjoni futura bejn l-UE u r-Renju Unit wara l-ħruġ tar-Renju Unit mill-UE.

Il-Ftehim dwar il-Kummerċ u l-Kooperazzjoni ġie konkluż f'Diċembru 2020 u applikat proviżorjament mill-1 ta' Jannar 2021. L-approvazzjoni tal-Parlament hija neċessarja biex il-ftehim jidħol fis-seħħ.

F'riżoluzzjoni li takkumpanjaha, il-Membri tal-PE jesprimu dispjaċir għall-ħruġ tar-Renju Unit u sejħulu "żball storiku", iżda jilqgħu l-ftehim, billi jimminimizza t-tfixkil għall-kummerċ u jgħin biex tinżamm il-paċi fil-gżira tal-Irlanda.

Deskrizzjoni:

Il-Parlament Ewropew japprova leġiżlazzjoni li tistabbilixxi mekkaniżmu li jkun jippermetti s-sospensjoni tal-pagamenti tal-baġit lil pajjiż tal-UE li jikser l-istat tad-dritt.

Il-Membri tal-PE jsostnu li l-att huwa neċessarju biex jitħarsu l-interessi finanzjarji tal-UE u l-valuri fundamentali tagħha. Il-Parlament huwa dejjem aktar imħasseb dwar il-fatt li, f'ċerti Stati Membri, id-demokrazija u l-istat tad-dritt jinsabu taħt attakk.

Deskrizzjoni:

Wara negozjati li damu xhur sħaħ, il-Parlament Ewropew u l-Kunsill jilħqu ftehim dwar il-baġit 2021-2027 tal-UE li, flimkien ma' pjan ta' rkupru separat magħruf bl-isem ta' "Next Generation EU", jipprovdi €1.8 triljun bħala appoġġ tal-UE għall-irkurpru mill-pandemija tal-COVID-19.

Il-Membri tal-PE jiksbu żieda fil-fondi għall-programmi ewlenin tal-UE, fosthom il-programm ta' riċerka Orizzont Ewropa, il-pjan ta' investiment InvestEU, il-programm ta' skambji Erasmus+ u l-programm "l-UE għas-Saħħa" l-ġdid, li jimmira li jtejjeb il-koordinament fis-saħħa u d-disponibbiltà ta' apparat u prodotti mediċi fl-UE kollha.

Il-Membri tal-PE u l-Istati Membri jaqblu wkoll dwar kalendarju vinkolanti għall-introduzzjoni ta' sorsi ġodda ta' dħul tal-UE biex jgħinu biex jitħallas lura d-dejn li daħlet għalih l-UE ħalli tiffinanzja l-pjan ta' rkupru Next Generation EU.

Deskrizzjoni:

Wara li coronavirus infirex mad-dinja b'mod allarmanti, u f'Wuhan, fiċ-Ċina, ġie rreġistrat l-ewwel, l-Organizzazzjoni Dinjija tas-Saħħa tiddikjara pandemija. Il-virus tal-COVID-19, kif beda jsir magħruf, jinġarr fl-arja u għalhekk jittieħed immens. Jikkawża sintomi qishom tal-influwenza.

In-numru ta' infezzjonijiet u ta' mwiet, speċjalment fost l-anzjani, jiżdied malajr, u dan wassal lill-pajjiżi tad-dinja kollha jdaħħlu miżuri ta' konteniment u restrizzjonijiet għall-ivvjaġġar. L-attività ekonomika tonqos f'daqqa u x-xogħol mid-dar isir in-normalità għal bosta.

Il-Parlament Ewropew jgħaddi għax-xogħol mill-bogħod, iżda jkompli bis-sessjonijiet plenarji u bil-laqgħat tal-kumitati. Il-Membri tal-PE jadottaw miżuri li joffru għajnuna fit-terminu qasir lis-setturi u lill-ħaddiema milquta u jagħmlu kontinwament appelli għal pakkett ta' appoġġ tal-UE biex iwitti t-triq għall-irkupru sostenibbli.

Deskrizzjoni:

Wara li l-Parlament Ewropew irratifika l-ftehim dwar il-ħruġ fid-29 ta' Jannar, ir-Renju Unit joħroġ mill-UE, madwar tliet snin u nofs wara li l-votanti appoġġjaw dan il-pass f'referendum.

Mill-1 ta' Frar, l-għadd ta' Stati Membri tal-UE huwa 27 u l-mandat tal-MPE eletti mir-Renju Unit jispiċċa. L-għadd ta' MPE huwa 705 (qabel kienu 751), peress li wħud mis-siġġijiet tar-Renju Unit huma allokati lil Stati Membri oħra biex jirriflettu l-bidliet demografiċi, filwaqt li oħrajn jinżammu f'riżerva għal meta pajjiż ieħor jissieħeb fl-UE.

Deskrizzjoni:

L-MPE jeleġġu l-Kummissjoni Ewropea mmexxija minn Ursula von der Leyen. Il-votazzjoni fil-plenarja ġġib fi tmiemu l-proċess twil ta' eżami bir-reqqa mill-Parlament tat-tim tal-Kummissarji propost, biex jiżgura li l-korp eżekuttiv tal-UE jkollu l-leġittimità demokratika li jaġixxi fl-interess tal-Ewropej kollha.

It-tim tal-Kummissarji jħaddan aktar nisa minn qatt qabel u von der Leyen issir l-ewwel mara li tokkupa l-kariga ta' President tal-Kummissjoni. Fost il-prijoritajiet hemm it-tranżizzjoni lejn ekonomija newtrali għall-klima, id-diġitalizzazzjoni u s-sigurtà, kif ukoll l-involviment attiv tal-Ewropej fid-dibattitu dwar il-futur tal-Ewropa.

Deskrizzjoni:

L-elezzjonijiet Ewropej f'Mejju 2019 jaraw madwar 51% tal-votanti tal-UE jmorru jivvutaw, l-ogħla rata ta' parteċipazzjoni f'20 sena. Il-Partit Popolari Ewropew ċentru-lemini u d-Demokratiċi Soċjali ċentru-xellugin jitilfu s-siġġijiet iżda jibqgħu l-akbar żewġ gruppi fil-Parlament, filwaqt li partiti ċentrali u liberali oħra jżidu s-siġġijiet.

Deskrizzjoni:

26 ta' Marzu 2019: Id-drittijiet tal-awtur għall-era diġitali

Fil-Parlament tiġi adottata Direttiva li għandha l-għan li tħares id-drittijiet tal-awtur ta' ħallieqa ta' kontenut bħal mużiċisti, artisti tal-ispettaklu u ġurnalisti u tgħinhom jinnegozjaw ftehimiet ta' rimunerazzjoni aħjar għall-użu tax-xogħlijiet tagħhom online. Ir-regoli jirriflettu l-arranġamenti dwar id-drittijiet tal-awtur li jeżistu fid-dinja offline u jagħmlu l-pjattaformi tal-internet responsabbli għall-kontenut kollu mtella' fuq is-siti web tagħhom.

27 ta' Marzu 2019: Il-Parlament jivvota biex jipprojbixxi l-prodotti magħmula minn plastik li jintuża darba biss

Il-Membri tal-PE japprovaw il-projbizzjoni tal-UE fuq oġġetti tal-plastik li jintremew wara l-użu bħal platti, pożati, straws u cotton buds li jispiċċaw bħala skart fuq ix-xtajtiet jew f'massa li dejjem qed tikber ta' plastik tifflowtja f'wiċċ l-ilma fl-ibħra tad-dinja. Il-prodotti koperti mil-liġi jikkostitwixxu madwar 70% tal-oġġetti ta' żibel marin.

Deskrizzjoni:

Il-Membri tal-PE jagħtu l-approvazzjoni tagħhom għal ftehim ta' sħubija ekonomika bejn l-UE u l-Ġappun li jneħħi kważi d-dazji doganali kollha bejn iż-żewġ naħat u joħloq żona ta' kummerċ li tkopri terz tal-PDG globali. Il-ftehim jikkonferma għal darb'oħra l-impenn tal-UE favur kummerċ ħieles li joħloq l-impjiegi u l-opportunitajiet għan-negozju.

Deskrizzjoni:

Jidħlu fis-seħħ regoli ġodda li jillimitaw il-prezzijiet tat-telefonati u l-messaġġi lejn pajjiżi oħra tal-UE. Ir-regoli jsegwu t-tneħħija tat-tariffi tar-roaming fl-Ewropa u jiġu wara li l-Parlament Ewropew introduċa bidliet fil-proposti tal-Kummissjoni dwar il-leġiżlazzjoni dwar it-telekomunikazzjoni.

Deskrizzjoni:

Jidħol fis-seħħ ir-Regolament Ġenerali tal-UE dwar il-Protezzjoni tad-Data (GDPR), li jiżgura standard għoli ta' protezzjoni tad-data personali fl-UE kollha. Ir-regoli għandhom l-għan li jipproteġu liċ-ċittadini kollha tal-UE minn ksur tal-privatezza u tad-data f'dinja dejjem aktar xprunata mid-data, filwaqt li joħolqu qafas aktar ċar u konsistenti għan-negozji.

Deskrizzjoni:

Ir-restrizzjonijiet imposti min-negozji online abbażi tan-nazzjonalità jew tal-post ta' konnessjoni saru ħaġa tal-passat fl-UE wara d-dħul fis-seħħ ta' liġi tal-UE li tipprojbixxi din il-prattika. Il-bejjiegħa bl-imnut huma obbligati jagħtu aċċess lin-nies għal oġġetti u servizzi bl-istess termini madwar l-UE kollha. Din hija waħda minn ħafna miżuri li ttieħdu biex jinbena suq uniku diġitali fl-Ewropa kollha.

Deskrizzjoni:

Fl-UE jitneħħew it-tariffi tar-roaming imposti mill-operaturi tat-telekomunikazzjoni fuq il-vjaġġaturi. Dan jippermetti lin-nies fuq żjara qasira f'pajjiż ieħor tal-UE jgawdu telefonati mobbli u servizzi tad-data bil-prezzijiet li jħallsu f'pajjiżhom.

L-eliminazzjoni tat-tariffi tar-roaming kienet kwistjoni ewlenija għall-Parlament Ewropew.

Deskrizzjoni:

Il-Parlament jiftaħ mużew ġdid fi Brussell, iddedikat għall-istorja tal-Ewropa. Dar l-Istorja Ewropea għandha l-għan li tħeġġeġ ir-riflessjoni u d-dibattitu dwar il-passat u l-preżent tal-Ewropa. Barra minn hekk, tkabbar l-offerta tal-Parlament għall-viżitaturi, li tinkludi wkoll iċ-ċentru modern u interattiv tal-viżitaturi, magħruf bħala l-Parlamentarium. Verżjonijiet iżgħar tal-Parlamentarium jilqgħu lill-viżitaturi fi Strasburgu, Berlin u Ljubljana.

Deskrizzjoni:

Il-votanti tar-Renju Unit jiddeċiedu li jappoġġjaw il-ħruġ mill-Unjoni Ewropea f'referendum kumbattut, imsejjaħ mill-Prim Ministru tar-Renju Unit David Cameron. Ir-riżultat tar-referendum jiskatta r-riżenja ta' Cameron. Is-suċċessur tiegħu Theresa May twiegħed li toħroġ lir-Renju Unit mill-UE, u tibda l-proċess fid-29 ta' Marzu 2017.

Deskrizzjoni:

Qattiela suwiċidi jisplodu lilhom infushom fl-Ajruport ta' Brussell u fi stazzjon tal-metro fi Brussell u joqtlu total ta' 32 ruħ.

L-Istat Iżlamiku jiddikjara r-responsabbiltà għall-attakk. Fix-xhur ta' wara, il-grupp jiddikjara li kien responsabbli għal attakki terroristiċi oħra f'Nizza, Berlin, Istanbul u Barċellona. Persuni oħra nqatlu mit-terroristi f'Manchester, Londra, San Pietruburgu, Stokkolma u fi bliet Ewropej oħra.

Bi tweġiba, il-pajjiżi tal-UE jaqblu li jsaħħu s-sigurtà tal-fruntieri, itejbu l-kooperazzjoni fost is-servizzi tal-intelligence u jaħdmu biex jipprevjenu r-radikalizzazzjoni.

Deskrizzjoni:

Wara snin ta' negozjati, f'Pariġi jiġi konkluż ftehim globali biex jitnaqqsu l-emissjonijiet ta' gassijiet serra madwar id-dinja, u b'hekk tiġi evitata żieda perikoluża fit-temperatura medja dinjija.

Il-Parlament Ewropew jieħu sehem fil-proċess, billi għandu rwol importanti fl-adozzjoni ta' leġiżlazzjoni sussegwenti tal-UE.

Fl-2017 il-President tal-Istati Uniti Donald Trump iħabbar li l-Istati Uniti, it-tieni l-akbar emittent ta' gassijiet serra wara ċ-Ċina, se joħorġu mill-ftehim, u b'hekk jagħmilha aktar diffiċli li jittaffa t-tibdil fil-klima.

Deskrizzjoni:

Terroristi jwettqu sensiela ta' attakki kkoordinati f'postijiet differenti f'Pariġi, jiftħu n-nar u jagħmlu splużjonijiet permezz ta' ġkieket għal attakki suwiċida.

Fl-attakki jmutu total ta' 130 persuna- 89 minnhom kienu f'kunċert mużikali fit-teatru Bataclan, waqt li oħrajn kienu f'ristoranti u kafetteriji.

L-Istat Iżlamiku ddikjara r-responsabbiltà għall-attakki mwettqa minn ċittadini Franċiżi u Belġjani.

L-awtoritajiet Franċiżi jiddikjaraw stat ta' emerġenza, u jagħtu setgħat estiżi lill-forzi tas-sigurtà, li jkomplu tul is-sentejn ta' wara.

Deskrizzjoni:

L-għadd ta' persuni li jaqsmu l-Mediterran biex ifittxu asil fl-Ewropa jitla' b'mod stabbli matul l-2014 u l-2015 biex jilħaq il-quċċata fit-tieni nofs tal-2015.

Aktar minn 2.5 miljun ruħ japplikaw għall-asil fl-UE fl-2015 u l-2016 – ħafna minnhom qed jaħarbu l-gwerra u l-vjolenza f'pajjiżi bħas-Sirja, l-Afganistan u l-Iraq.

Oħrajn huma migranti ekonomiċi li qed jippruvaw joħorġu mill-faqar. Il-Greċja u l-Italja jirċievu l-parti l-kbira tal-migranti u jbatu biex ilaħħqu mal-influss, filwaqt li jinħoloq tilwim fost il-pajjiżi tal-UE dwar kif għandha tiġi ttrattata l-kriżi.

Ir-riforma tas-sistema tal-asil u t-tisħiħ tas-sigurtà fil-fruntieri jirriżultaw bħala elementi ewlenin tat-tweġiba tal-UE.